Home / Tech News / Telugu tech news

· 17 views · Telugu tech news

షెన్జెన్ పోస్టల్ సెంటర్లలో ఏఐ రోబోలు నైట్ షిఫ్ట్ డ్యూటీ: గంటకు 1000–1200 పార్సెల్స్ సార్టింగ్, 95% కంటే ఎక్కువ ఖచ్చితత్వం

చైనా టెక్నాలజీ హబ్‌గా పేరుగాంచిన షెన్జెన్ నగరంలో ఏఐ రోబోలు పోస్టల్ సెంటర్లలో నైట్ షిఫ్ట్ డ్యూటీలు చేస్తూ రికార్డులు సృష్టిస్తున్నాయి. మనుషులకు బదులుగా ఇప్పుడు ఈ అధునాతన రోబోలే రాత్రి వేళలో పార్సెల్ సార్టింగ్ పనులు చేస్తున్నాయి.

దక్షిణ చైనాలోని గ్వాంగ్‌డాంగ్ ప్రావిన్స్‌లో ఉన్న షెన్జెన్ పోస్టల్ సెంటర్‌లో మూడు అత్యాధునిక ఏఐ రోబోలు స్టార్ పెర్ఫార్మర్లుగా మారాయి. పార్సెల్ ఫీడింగ్ జోన్‌లో వివిధ ఆకారాలు, సైజుల్లో ఉన్న పార్సెల్లను ఇవి అత్యంత సులభంగా గుర్తిస్తాయి. వాటి షిప్పింగ్ లేబుల్ పైకి కనిపించేలా తిప్పి, కన్వేయర్ బెల్ట్‌పై కేటాయించిన స్థలంలో జాగ్రత్తగా ఉంచుతాయి.

ఈ రోబోలు “గ్రహించడం – నిర్ణయించడం – అమలు చేయడం” అనే ఎండ్-టు-ఎండ్ సిస్టమ్‌తో పనిచేస్తాయి. తలభాగంలో ఉన్న కెమెరాలు పార్సెల్ రకం, స్థానాన్ని గుర్తించి సమాచారాన్ని రోబో మెదడుకు చేరవేస్తాయి. ఆ పార్సెల్‌ను ఒక చేతితో పట్టుకోవాలా, రెండు చేతులతోనా, లేదా తిప్పాలా అనేది అదే నిర్ణయించుకొని పనిని పూర్తి చేస్తుంది.

సాధారణ పార్సెల్లను హ్యాండిల్ చేయడమే కాకుండా, డ్యామేజ్ అయినవి, లేబుల్ సరిగా లేనివి, లేదా స్తూపాకారంలో ఉండి దొర్లిపోయే అవకాశం ఉన్న పార్సెల్లను కూడా ఈ రోబోలు గుర్తించి పక్కన పెడతాయి. వాటిని మనుషులు మాన్యువల్‌గా ప్రాసెస్ చేసేలా వేరు చేస్తాయి. తద్వారా పార్సెల్లు పోకుండా, తప్పు అడ్రెస్‌లకు వెళ్లకుండా కాపాడుతున్నాయి.

గంటకు ఏకంగా 1,000 నుంచి 1,200 పార్సెల్లను ఇవి సార్టింగ్ చేయగలవు. 95 శాతానికి పైగా ఖచ్చితత్వంతో పని చేస్తున్నాయని అక్కడి మేనేజర్ తెలిపారు. రాత్రి వేళల్లో సుదీర్ఘంగా ఒకే రకమైన శారీరక శ్రమతో కూడిన పనులు చేసే సిబ్బందికి ఈ రోబోలు ఎంతో ఊరటనిస్తున్నాయి. పండుగలు లేదా రద్దీ సమయాల్లో సిబ్బందితో కలిసి పని చేస్తూ భారాన్ని తగ్గిస్తున్నాయి.

ఏఐ టెక్నాలజీ సాయంతో మనుషుల కష్టాన్ని, పని భారాన్ని ఎలా తగ్గించవచ్చో ఈ రోబోలు నిరూపిస్తున్నాయి. భవిష్యత్తులో లాజిస్టిక్స్ మరియు ఈ-కామర్స్ రంగంలో ఈ ఎంబాడెడ్ ఏఐ రోబోలు విప్లవాత్మక మార్పులు తీసుకురావడం ఖాయంగా కనిపిస్తుంది.

మూలం: EENADU.

Suggested